Gjatë ditës së djeshme kanë humbur jetën tre kosovarë nga Gjilani në Shqipëri, pasi të njëjtit dyshohet se janë helmuar me ushqim.

Sot familjarët e tre viktimave kanë mbajtur një konferencë për media, ku kanë thënë se mjekët neglizhuan rastin, kanë dyshime përtej helmimit, raporton arbresh.info

Haki Haliti familjar i familjes nga Gjilani që humbën tre anëtarë në Shqipëri pas dyshimeve të para për helimim, ka akuzuar stafin mjekësor në Spitalin e Manzës dhe atë të Tiranës për neglizhencë.

Ai në një konferencë për media sot ka thënë se tre familjarëve tashmë të ndjerë nuk u është bërë trajtimi i parë ashtu siç duhet.

“Janë infektuar nga disa ushqime. Shqetësuese për neve ka qenë mos trajtimi i duhur në spitalin e Manzës. Tre persona me shku me simptoma të njëjta dhe me i liruar pa analiza ka qenë e çuditshme”,ka thënë ai.

Tutje Hakiu që në këtë rast ka humbur babin, nënën dhe gjyshen tha se ka kontaktuar me babain e tij pas tretmanin të parë mjekësor, ku e ka kuptuar që është në gjendje të rëndë.

Sipas tij trajtimi jo i duhur ka qenë edhe në Spitalin e Tiranës, duke ju thënë se tash është vonë pasi kanë kaluar tre ditë pas helmimit. Ai tha dyshimet për ngjarjen shkojnë përtej helmimit pasi ka ngordhur edhe qeni i tyre, që sipas tij ai nuk kishte ngrënë kërpudha.

“Sipas raporteve që i kemi diskutuar këtu në Gjilan me ekspertë mjekësor, sjellja e mjekëve në Gjirin e Lalzit e Tiranë ka qenë në joprofesionale. Në spitalin e Tiranës kemi pritur tre orë për analiza. Jam konsultuar me mjekun aty në spital dhe e pyeta se çka mundemi me bo sa më shpejt, por ai më tha se është shumë vonë. Për disa analiza, ai më tha që të shkojë në laboratorin e tij privat. Kur i mora analizat pas tre ore, më tha se duhet më shumë analiza, por është shumë vonë. Falë dashamirëve të shumë të prindit tim, është bërë gjithçka çka ka qenë e mundur për t’i shpëtuar, është fjala pas intervenimit”, u shpreh ai.

Haliti thotë se ata kishin shtëpi të tyre në Shqipëri dhe se babi i tij kishte njohuri për atë pjesë ku ka qenë por edhe llojet e kërpudhave.

“Dyshime për rastin ngjallë edhe ngordhja e qenit. Ai ka pasur ushqimin vet dhe nuk ka ngrënë kërpudha. Babai im e kishte hobi daljen në ecje dhe kishte njohuri edhe për llojet e kërpudhave”.

Familjarët kanë thënë se presin verdiktin e fundit nga drejtësia për këtë rast. /arbresh.info/